Samarqand Davlat Tibbiyot Universitetining faollar zalida O‘zbekiston  kasaba uyushmalari Federatsiyasi tasarrufidagi “Ishonch” va Ishonch doveriye” gazetalari tahririyati bosh muharriri Husan Ermatov ishtirokida Samarqand ijodkorlari, ziyolilari, kasaba uyushma faollari va gazeta mushtariylari bilan davra suhbati bo‘lib o‘tdi.

Tadbirda O‘zbekiston kasaba uyushmalari Federatsiyasining Samarqand viloyat kengashi raisi o‘rinbosari Akbar Abdusaidov ishtirok etib, gazetada chop etilayotgan maqolalar dolzarbligi, mazmun mohiyati jihatdan respublikamizda yetakchi gazetalarda biriga aylanganini ta’kidladi.

 “Ishonch va Ishonch-doveriye” gazetalari bosh muharriri Husan Ermatov ijodiy hisobot taqdim etdi. Tahririyat rahbari qayd etganidek, gazetaning har bir chiqishida umum e’tirofga manzur maqolalar saralab olinishiga e’tibor qaratiladi.

Tanqidiy va tahliliy maqolalar, ko‘tarilgan masalalar yechimi, mutasaddilar munosabati muttasil yoritilmoqda. Mushtariylarga o‘zlarini qiynayotgan masalani ko‘tarib chiqishlari uchun keng yo‘l berilgan. Xususan, “Javobini kutayotgan savollar”, rukuni ostida berilayotgan maqolalarning mulliflari bevosita “Ishonch” mushtariylari sanalishadi.

Oliy Majlis Senati a’zosi, O‘zbekiston Jurnalistlari ijodiy uyushmasi viloyat bo‘limi rahbari, “Zarafshon”-“Samarkandskiy vestnik” gazetalari bosh muharriri Farmon Toshev axborot asrida bosma nashrlar oldida turgan muammolar, mushtariylar uchun fidoiylik ko‘rsatib izlanish olib borayotgan matbuotchilarning mashaqqatli va zalvorli mehnatini e’tirof etdi. Muloqot ishtirokchilariga o‘z mulohazalarini emin – erkin bildirish, gazeta sahifalari mazmunini boyitish borasidagi taklif va tavsiyalariga keng o‘rin berilayotganligi qayd etildi.

Tadbir doirasida savol va javoblar bo‘lib o‘tdi. Savollarga to‘g‘ri javob bera olgan g‘oliblarga tahririyatning esdalik sovg‘alari topshirildi.