Ижтимоий шерикчилик тамойилларини ўзида мужассам этган жамоа шартномалари ходим манфаатлари ифодасидир. Жойларда бўлиб ўтаётган муҳокамаларда мазкур ҳужжатда акс этган имтиёзларнинг амалиётга жорий этилишига яна бир қур назар ташланаётир.
Жамоа шартномасида кўзда тутилган меёрлар ижроси устидан назорат олиб бориш бошланғич касаба уюшма ташкилоти етакчиси зиммасида. Муҳокамалар жараёнида ҳудудаги мингдан зиёд ташкилотларда бир йиллик фаолият таҳлили самарали ташкил этилди. Жамоа олдида ҳисоб берган иш берувчилар ҳамкорликнинг самарадорлигини оширишга тайёр эканлигини билдиришди. 1230 дан ортиқ меҳнат жамоаларида амалдаги қонунчиликка биноан янгиланган жамоа шартномалари қабул қилинди.
Вилоятнинг барча ҳудуларида жамоа шартномасининг муҳокамасини ташкил этишга доир семинарлар ўтказдик. Унда жамоат ташкилотнинг қуйи бўғин етакчиларига тавсиялар берилди. Бирлашма кенгаши масъул ходимлари барча ташкилотларда бўлиб ўтаётган муҳокамага доир тадбирларда иштирок этди. Бундан ташқари муҳокамалар сифати таҳлил этиб борилди. Кузатишларимиз боис ҳар бир вакилимизнинг ўз ишларига қандай ёндашаётганлигига аниқлик киритиб олдик.
Тан олиш керак баъзи ташкилотларда ҳали ҳам хўжакўрсинчиликка йўл қўяётганлиги аниқланди. Энг ачинарлиси айрим тоифа етакчиларимизда жамоатчилик ишларига панжа орасидан қараш, реал воқеликка кириб бора олмаслик ҳолатлари мавжуд экан. Шунинг учун яқинда фаолларимиз барча туман ва шаҳарларда бўлишиб фаолиятида сусткашликка йўл қўяётган ташкилотлар билан алоҳида тушинтириш ишлари олиб борди. Аравасини тортмаётган бошланғич раҳбарлари ўрнига ташаббускор, ҳаракатчан, масъулиятни ҳис этадиган ёшларни жалб этишга қарор қилдик. Айни дамда ана шундай кадрлар заҳирасини яратиш юзасидан ҳам ишлар бошлаб юборилди.
Қисқа қилиб айтганда, жамоа шартномалари муҳокамасига доир жараёнлар фаолиятга бир қур назар ташлаш, ишларни жонлантириш имконини бераётир.
Ойбек Исмоилов
