Регби спорт турини оммавийлаштиришга жамоат ташкилоти бўлмиш касаба уюшмалари ҳам фаол иштирок этмоқда. Касаба уюшмалари ташаббуси билан Тойлоқ болалар-ўсмирлар спорт мактабида регбини оммалаштиришга бағишланган кўргазмали амалий семинар ҳамда регби бўйича Самарқанд вилояти очиқ биринчилиги ўтказилди.
Спортнинг оммавийлигини таъминлашга бағишланган тадбирда Тойлоқ, Нуробод, Иштихон, Ургут, Жомбой, Паст Дарғом, Каттақўрғон тумани ёш спортчилари қатнашди.
Ўзбекистон Регби федерацияси ижрочи директори Р.Самиев ушбу спорт турининг оммавийлигини ошириш ҳамда жамоаларни шакллантириб, республика ва халқаро мусобақаларга тайёрлаш хусусида сўз юритди. Шунингдек, Президентимизнинг 2019 йил 29 октябрдаги “Ўзбекистон Республикасида регби спорт турини ривожлантириш чора-тадбирлари тўғрисида”ги қарорида белгиланган вазифалар ижросини таъминлаш борасида амалга оширилаётган ишларга тўхталди. Мутахассис сифатида регбининг барча қоидаларини кўргазмали тарзда тушунтириб берди.
Тадбир давомида ўтказилган регби бўйича вилоят очиқ биринчилигида Нуробод тумани регбичилари жамоаси ғолибликни қўлга киритди. Иккинчи ва учинчи ўринлар Тойлоқ ихтисослаштирилган олимпиа захиралари мактаб-интернати ҳамда Паст Дарғом тумани жамоасига насиб этди.
Ғолиб ва совриндорларга ташкилотчилар томонидан диплом ҳамда эсдалик совғалари топширилди.
Бахтиёр Туробов, масъул ташкилотчи
Spelling error report
The following text will be sent to our editors: